Tokayev prezidentliyə namizəd oldu
03.05.2019
Qazaxıstanın Mərkəzi Seçki Komissiyası ölkənin müvəqqəti başçısı Kasım-Jomart Tokayevin prezidentliyə namizədliyini qeydiyyata alıb.
Bu haqda Tengrinews.kz yazır.
Tokayev bununla da Qazaxıstanda prezidentliyə ilk rəsmi namizəd olub.
Namizədliyin qeydiyyata alınması üçün onun bütün lazımi sənədləri təqdim etdiyi, ümumilikdə Qazaxıstanın 17 bölgəsindən 313 653 imzanın toplandığı bildirilir.
Xatırladaq ki, bundan əvvəl Qazaxıstanın birinci prezidenti Nursultan Nazarbayev Nur Otan partiyasının qurultayında Kasım-Jomart Tokayevin prezidentliyə namizədliyinin irəli sürülməsini təklif etmişdi. Onun təklifi səsvermədə yekdilliklə qəbul olunmuşdu.
Qeyd edək ki, Qazaxıstanda növbədənkənar prezident seçkiləri iyunun 9-da keçiriləcək.
