Azərbaycanda uşaq telekanalı yaradıla bilər
27.02.2019
Gələcəkdə Azərbaycanda ümumrespublika yayımlı uşaq telekanalının yaradılması məsələsinə baxıla bilər.
"Dövran Media" bildirir ki, bunu Trend-ə özəl müsahibəsində Milli Televiziya və Radio Şurasının (MTRŞ) sədri Nuşirəvan Məhərrəmli deyib.
N.Məhərrəmli qeyd edib ki, rəhbərlik etdiyi qurum uşaq televiziya kanalının yaradılmasında maraqlıdır: "Lakin bunun üçün də əsas olmalıdır. Ola bilsin ki, gələcəkdə bu məsələyə baxılsın".
O əlavə edib ki, Şura milli cizgi filmlərinin çəkilməsi məsələsinə xüsusi yanaşır: "Hətta əvvəllər cizgi filmlərinin çəkilməsi ilə bağlı məsələ də qaldırmışdıq. Azərbaycan uşaqları xarici cizgi filmləri əsasında böyüməməlidirlər".
MTRŞ sədrinin fikrincə, maliyyə imkanları çərçivəsində hər il heç olmasa bir neçə cizgi filmi çəkilməlidir ki, müəyyən müddətdən sonra o cizgi filmlərindən artıq böyük bir arxiv formalaşdırılsın və uşaqlar həmin filmlər əsasında böyüsünlər:
"Bilirsiniz ki, Azərbaycanda "ARB Günəş" adında cizgi filmləri göstərən televiziya fəaliyyət göstərir. Burada nümayiş olunan cizgi filmlər Azərbaycan dilində səsləndiyi üçün bütün alələr o filmləri uşaqlarına göstərirlər. Bu, çox müsbət bir tendensiyadır. Baxmayaraq ki, həmin telekanal bölgələrdə yayımlanır, biz onun kabel şəbəkəsində yayımı üçün şərait yaratdıq".
