Prezidentin imzasını saxtalaşdıran deputat köməkçisi saxlanılıb - FOTO
15.02.2019
Polis əməkdaşları məmur postlarını "satan" 32 yaşlı Dərbənd sakini Beytulla Cavadovu saxlayıblar. Hazırda onun əməllərindən 10 nəfərin zərər çəkməsi məlumdur. Dələduz karyera pilləkəni ilə irəliləmək istəyənlərə göstərəcəyi "xidmətə" görə azı 15 milyon rubl mənimsəyib.
"Dövran Media" virtualaz.org-a istinadən xəbər verir ki, Cavadov məmur postlarının satışına Dağıstan parlamentinin deputatı Leyla Kərimovanın köməkçisi olduqdan sonra başlayıb. Qurbanlarını əlindəki imkanlara inandırmaq üçün onlara respublikanın birinci şəxsləri ilə fotoşəkillərini, Azərbaycan və Rusiya prezidentlərinin saxta fəxri fərmanlarını, adlı saatlarını göstərib.
Dələduz Cavadov təhsil nazirinin müavini vəzifəsi üçün 4 milyon rubl, rayon başçısı vəzifəsi üçün 2-3 milyon, baş nazir vəzifəsi üçüncə cəmi 5 milyon rubl istəyib.
Bundan başqa, Beytulla Cavadov müəyyən məbləğ qarşılığında dövlət proqramı üzrə mənzil almaqda kömək edəcəyinə söz verib. Əlil uşağı olan ailə mənzil alınması prosesini sürətləndirmək üçün dələduza 300 min rubl verib.
Cavadov fevralın 11-də tutulub və onun barəsində Rusiya Federasiyası Cinayət Məcəlləsinin 91-ci maddəsi üzrə cinayət işi başlanıb. Polis dələduzun əməllərindən zərər çəkənləri hüquq-mühafizə orqanlarına müraciət etməyə çağırıb.
