Ötən gün güclü yağışların regionlarda törətdiyi fəsadlar barədə AÇIQLAMA
19.06.2023
Gədəbəy, Daşkəsən, Tovuz, Gəncə, Göygöl, Naftalan, Yevlax, Qusar, Quba, Goranboyda, eləcə də Ağdamda leysan yağışlarından sonrakı durum açıqlanıb.
"Azərbaycan Meliorasiya və Su Təsərrüfatı” ASC-nin nümayəndəsi Dilqəm Şərifov Oxu.Az-ın sorğusuna cavab olaraq bildirib ki, sadalanan ərazilərdə yağıntılar müşahidə edilsə də, təsərrüfat sahələrinə ciddi ziyan dəyməyib:
"Mühafizə bəndləri, kanalları ziyan görməyib. Hava şəraiti ilə bağlı əməkdaşlarımız yaxın ərazilərdə növbəli işlər aparıblar. Canlı qüvvələrimiz və texnikalarımız hazırlıqlı vəziyyətdə saxlanılıb. Sadəcə olaraq müəyyən suvarma kanalları lil ilə dolub, bəzi yerləri sel yuyub. İndi də texnikalarımız selin gətirdiyi lili təmizləyir”.
Qeyd edək ki, iyunun 18-də saat 16:00-a olan məlumata əsasən, Gədəbəy, Daşkəsən, Tovuz, Gəncə, Göygöl, Naftalan, Yevlax, Qusar, Quba, Goranboyda şimşək çaxıb, arabir leysan xarakterli yağış yağıb.
