Həştərxanda Heydər Əliyevin 100 illik yubileyinə həsr olunmuş konfrans başlayıb
08.05.2023
Həştərxanda Heydər Əliyevin anadan olmasının 100 illiyinə həsr olunmuş "Azərbaycan Respublikası ilə Həştərxan vilayəti arasında iqtisadi-ticarət və humanitar sahədə əməkdaşlıq: mövcud vəziyyət və perspektivlər” mövzusunda konfrans işinə başlayıb.
"Report” xəbər verir ki, tədbiri giriş sözü ilə açan Həştərxanın vitse-qubernatoru, vilayət administrasiyasının rəhbəri Pavel Pautov Azərbaycanın Həştərxan üçün mühüm strateji tərəfdaş olduğunu vurğulayıb.
"Azərbaycanla Həştərxan arasında iqtisadi əməkdaşlığın göstəriciləri müsbət dinamika nümayiş etdirir. Azərbaycan bizim üçün strateji istiqamətdir", - o deyib.
P.Pautovun sözlərinə görə, gələcək əməkdaşlığın inkişafı daha çox "Şimal-Cənub” nəqliyyat dəhlizinin gələcəyi ilə bağlıdır.
"Hazırda Ələt Azad İqtisadi Zonasında görülən işlər heyrətamizdir. Bizim üçün bu, təkcə daşımaların artması deyil, həm də yeni iş yerlərinin açılması, sosial sahənin inkişafı deməkdir", - o əlavə edib.
