“Qarabağ”-“Qalatasaray” matçı üçün ekspres marşrutlar təşkil edilib
24.03.2023
"Qarabağ” və "Qalatasaray” futbol komandaları arasında keçiriləcək yoldaşlıq oyunu ilə əlaqədar azarkeşlərin daşınmasının həyata keçirilməsi məqsədilə martın 26-da metronun "Qara Qarayev” stansiyası və Səməd Vurğun bağını (Dilarə Əliyeva küçəsi) Bakı Olimpiya Stadionu ilə əlaqələndirən X1 və X2 nömrəli ekspres marşrutlar təşkil edilib.
Bu barədə Bakı Nəqliyyat Agentliyi (BNA) məlumat yayıb.
Bildirilib ki, ekspres xətt üzrə avtobuslarla azarkeşlərin Bakı Olimpiya Stadionuna daşınması saat 18:00-dan başlayaraq icra ediləcək. Ekspres xətt üzrə sonuncu avtobus 19:30-da metronun "28 May”, 19:45-də "Qara Qarayev” stansiyasından Bakı Olimpiya Stadionunun İctimai Nəqliyyat Terminalına hərəkət edəcək.
Oyun bitdikdən sonra azarkeşlərin stadionun İctimai Nəqliyyat Terminalından metronun "Qara Qarayev” və "28 May” stansiyaları (Səməd Vurğun bağı) istiqamətində daşınması həyata keçiriləcək.
Azarkeşlərdən xahiş edilib ki, oyun bitdikdən sonra İctimai Nəqliyyat Terminalına getmək üçün şimal piyada körpü keçid məntəqəsi istiqamətində hərəkət etsinlər.
