Qazi: “Döyüşlərdə yaralansam da, valideynlərimə bildirmədim” - FOTO
19.07.2022
2020-ci il sentyabrın 27-də başlayan və 44 gün davam edən Vətən müharibəsi nəticəsində Azərbaycan öz doğma torpaqlarına qovuşdu.
Torpaqlarımızın işğaldan azad edilməsində Azərbaycanın vətənpərvər oğulları canlarından keçdilər.
Bununla yanaşı, döyüşlərdə yaralanan qazilərimiz də oldu.
Onlardan biri də Elvin Əhmədzadədir.
1996-cı ildə Bakı şəhərində ziyalı ailəsində dünyaya gələn qazi bildirib ki, könüllü olaraq döyüşlərə qatılıb:
"İqtisad Universitetində təhsil almışam. Vətən müharibəsi başlayan ilk gündən öz istəyimlə döyüşlərə qatıldım. Döyüş yoldaşlarımla Füzuli uğrunda gedən ağır döyüşlərdə iştirak etdik. Həmin vaxt yaralansam da, valideynlərimə bu barədə heç bir məlumat vermədim. Daha sonra döyüşlərə yenidən qatıldım. Valideynlərimə mesaj yazdım ki, məndən narahat olmayın və Laçını almağa gedəcəyik”.
E.Əhmədzadə qeyd edib ki, Xocavənd istiqamətində hücuma keçərkən ağır yaralanıb.
O, döyüşlərdən qayıtdıqdan sonra bir neçə dəfə əməliyyat olub.
Qazimiz "Füzulinin azad olunmasına görə”, "Xocavəndin azad olunmasına görə” medalları ilə təltif olunub. Eyni zamanda sosial təminatla təmin olunub.
