Qarabağ erməniləri “hərbi hazırlığa” başlayır
16.02.2022
Azərbaycanın Qarabağ iqtisadi zonasının bir hissəsində müvəqqəti yerləşən rus sülhməramlılarının himayəsi altında fəaliyyətlərini genişləndirən erməni separatçıları təxribatlarından əl çəkmir.
Qarabağdakı erməni separatçı dəstəsinin "təhlükəsizlik şurası katibi” Vitali Balasanyan erməni əhali arasında hərbi hazırlığın artırılacağını bildirib.
O deyib ki, fevral-may ayları arasında baş tutacaq tədbirlərdə erməni əhali hərbi bilik və bacarıqlarını təkmilləşdirəcək, atıcılıq məşğələlərinə cəlb ediləcəklər.
Tədbirlərə "dövlət idarələrində işləyənlər və iri şirkətlərin işçilərinin” cəlb ediləcəyini bildirən Balasanyan say açıqlamayıb.
Qeyd edək ki, Ermənistan 2022-ci ildə Qarabağda yerləşdirilən əhali üçün 288 milyon dollar vəsait ayırıb. Bu vəsaitin əhəmiyyətli hissəsinin silah-sursat alınmasına və Azərbaycan torpaqlarındakı qanunsuz silahlı birləşmələrin saxlanılmasına xərclənəcəyi şübhə doğurmur.
Ən son məlumata görə, Qarabağda məskunlaşdırılan erməni əhalinin sayı 27 mindir.
