Şübhəli sərnişin təyyarədən endirilib
11.09.2020
Sentyabrın 11-də Yaponiyanın "Jetstar Japan” aviaşirkətinə məxsus təyyarənin sərnişini partladıcı qurğuya malik olduğunu bildirdikdən sonra laynerdən endirilib.
Bu barədə cümə günü Kyodo agentliyi məlumat yayıb. Bildirilir ki, hüquq-mühafizə orqanlarına təhvil verilən sərnişində partladıcı qurğu aşkar edilməyib.
"Jetstar Japan” şirkətinə məxsus təyyarənin Tokiodan Okinava prefekturasındakı Naha şəhərinə uçuşa hazırlaşdığı qeyd edilir. Göyərtədə ümumilikdə 140 nəfər olub. Göyərtə bələdçiləri yoxlama zamanı qəza çıxışının qarşısında oturan iki kişidən əl yüklərini baqaj rəfinə yerləşdirməyi xahiş ediblər. Həmin an onlardan biri bildirib ki, onun çantasında partladıcı qurğu var. Həmin sərnişin axtarış və sorğu-sual üçün təyyarədən endirilib.
Hadisə nəticəsində təyyarənin uçuşunun bir neçə saat gecikdiyi də bildirilir.
