ABŞ-ın Suriyadakı gizli planı üzə çıxdı
04.11.2019
ABŞ Suriyanın neft bölgələrində hərbi mövcudluğunu gücləndirəcəyini açıqladıqdan sonra hərəkətə keçib.
Xəbər verildiyi kimi,"Anadolu” agentliyi ABŞ-ın Suriyanın Deyrizor bölgəsində hərbi istehkamlarını artırdığı haqda məlumat yayıb.
Yerli mənbələrin məlumatına görə, ABŞ Deyrizorun 113-cü Tuqay və Sur ərazisi yaxınlığında hərbi baza qurmağa başlayıb.
Hər iki ərazidə inşa işlərinin getdiyi deyilir. Artıq ABŞ 250-300 əsgər, zirehli və ağır texnika, o cümlədən, digər silah-sursatı əraziyə gətirib.
Qeyd edək ki, "Sülh Çeşməsi” əməliyyatı başlayandan sonra ABŞ Suriyanın şimalında hərbi varlığını nisbətən azaltmışdı. Lakin Deyrizor bölgəsində hərbi gücünü artırmağa davam edir. Oktyabrın 28-də İraqda 170 avtomobilin olduğu hərbi karvan bölgəyə gətirilib. ABŞ prezidenti Donald Tramp oktyabrın 23-də bəyan etmişdi ki, Suriyanın şərqindəki neft yataqlarının təhlükəsizliyini təmin ediblər və ABŞ əsgərlərinin bir qismi bu bölgədə qalacaq.
Məlumata görə, Suriyanın ən böyük neft bölgəsi olan Əl-Ömər ərazisini əsas hərbi baza kimi istifadə edən ABŞ-ın Deyirzorda da üç hərbi bazası mövcuddur. Deyirzorun qərbi Əsədin, neft yataqlarının olduğu şərq hissəsi isə PYD/YPG terrorçularının nəzarətindədir./publika.az/
